‘హాయ్ నాన్న’ దర్శకుడితో విజయ్ దేవరకొండ కొత్త సినిమా.. గ్లోబల్ టీమ్‌తో భారీ యాక్షన్ అడ్వెంచర్!

విజయ్ దేవరకొండ తన అభిమానులకు అదిరిపోయే అప్‌డేట్ ఇచ్చారు. తన తర్వాతి సినిమాను అధికారికంగా ప్రకటించారు. యువ దర్శకుడు శౌర్యువ్‌ దర్శకత్వంలో ఈ చిత్రం తెరకెక్కనుంది. ఈ విషయాన్ని విజయ్ తన ఇన్‌స్టాగ్రామ్ ఖాతా ద్వారా వెల్లడిస్తూ, ఓ ఆసక్తికరమైన పోస్టర్‌ను కూడా పంచుకున్నారు. ప్రపంచస్థాయి సాంకేతిక నిపుణులతో ఈ ప్రాజెక్ట్ రూపుదిద్దుకోనుండటంతో సినిమాపై అంచనాలు భారీగా పెరిగాయి.

ఈ సందర్భంగా విజయ్ దేవరకొండ తన పోస్టులో... "నా తర్వాతి చిత్రం #VDxShouryuv. ఈ భయపెట్టే సినిమాను రూపొందించే ధైర్యమైన బాధ్యతను తీసుకున్న బృందాన్ని పరిచయం చేస్తున్నాను. శౌర్యువ్‌ అద్భుతమైన ఆలోచనలకు, హృదయానికి తగ్గట్టుగా ఈ గ్లోబల్ టీమ్‌తో పనిచేస్తుండటం చాలా సంతోషంగా ఉంది. గర్జించండి మిత్రులారా. నా సర్వస్వాన్ని దీనికి ధారపోస్తాను" అంటూ అభిమానుల్లో ఉత్సాహం నింపారు. ఆయన పంచుకున్న పోస్టర్‌లో, నాలుగు కుక్కలను తీసుకుని నడుస్తుండగా, ఆయన వెనుక సాంకేతిక బృందం ఆయుధాలు పట్టుకుని కనిపించడం ఆసక్తి రేపుతోంది.

ఈ చిత్రానికి ప్రపంచస్థాయి సాంకేతిక బృందం పనిచేస్తుండటం విశేషం. ప్రపంచంలోని అత్యుత్తమ సినిమాటోగ్రాఫర్లలో ఒకరైన అలెజాండ్రో మార్టినెజ్ కెమెరామెన్‌గా వ్యవహరించనున్నారు. మలయాళంలో 'హృదయం' చిత్రంతో సంచలనాలు సృష్టించిన హేషమ్ అబ్దుల్ వాహబ్ సంగీతం అందిస్తున్నారు. ఇక 'గాడ్స్ ఆఫ్ ఈజిప్ట్', 'బ్యాట్మన్ ఫరెవర్' వంటి హాలీవుడ్ చిత్రాలకు పనిచేసిన ప్రముఖ విజువల్ ఎఫెక్ట్స్ డైరెక్టర్ ఎరిక్ డర్స్ట్ వీఎఫ్ఎక్స్ బాధ్యతలు చూసుకోనున్నారు. ప్రవీణ్ ఆంటోనీ ఎడిటర్‌గా, సురేష్ సెల్వరాజన్ ప్రొడక్షన్ డిజైనర్‌గా పనిచేయనున్నారు.

వైరా ఎంటర్‌టైన్‌మెంట్స్ పతాకంపై ఈ చిత్రాన్ని నిర్మించనుంది. "ఈ కోపమంతా ఒకప్పుడు ప్రేమే" (All this anger was once love) అనే ట్యాగ్‌లైన్ సినిమా కథపై క్యూరియాసిటీని పెంచుతోంది. ఇదిలా ఉంటే... విజయ్ దేవరకొండ పోస్టుపై నటి మృణాల్ ఠాకూర్ "లెట్స్ గోooooooo!" అని కామెంట్ చేశారు. దీంతో ఈ సినిమాలో హీరోయిన్‌గా ఆమెనే నటిస్తున్నారా? అనే ఊహాగానాలు మొదలయ్యాయి. మొత్తం మీద ఈ అనౌన్స్‌మెంట్ సినిమాపై అంచనాలను తారాస్థాయికి చేర్చింది.